Մեսրոպեան Վարժարանին Մէջ` Սարդարապատի Պատմական Յաղթանակի Նուիրուած Աշակերտական Տօնակատարութիւն
։
Հայաստանի Ա. հանրապետութեան 95-ամեակին առիթով, Հայ Կաթողիկէ Մեսրոպեան բարձրագոյն վարժարանին
մէջ, այսօր, 27 Մայիս 2013-ին, առաւօտեան ժամը 7:30-ին, վարժարանի շրջափակին մէջ տեղի
ունեցաւ աշակերտական տօնակատարութիւն, ներկայութեամբ վարժարանի տնօրէն պրն. Կրէկուար
Գալուստի, Ս. Փրկիչ եկեղեցւոյ փոխ ժողովրդապետ հայր Ղազար վրդ. Պետրոսեանի, ուսուցչական
կազմին եւ աշակերտութեան: Լիբանանի, Հայաստանի եւ Մեսրոպեան վարժարանի քայլերգներու
ունկնդրութենէն եւ դրօշակի արարողութենէն ետք, հանդիսութեան բացման խօսքը աշակերտական
խորհուրդին անունով արտասանեց Աննա-Քրիսթինա Գոլանճեան, որ նշեց, թէ Հայոց ցեղասպանութենէն
միայն երեք տարի ետք ծածանեցաւ մայիսեան արշալոյսի եռագոյնը եւ 28 Մայիս 1918-ի յաղթանակը
դարձաւ հայ ժողովուրդի պատմութեան ամենահերոսական եւ լուսաւոր թուականը: Գոլաճեան ըսաւ,
որ հայ աշակերտութիւնը պէտք է պաշտպանէ Հայաստանին անկախութիւնը, տէր կանգնի հայրենիքին
եւ իր բոլոր կարելիութիւնները ի գործ դնէ` կերտելու ամբողջական Հայաստանը: Ապա ելոյթ
ունեցան լիբանանահայ երգչուհի Շաքէ Պաղտասարեան, ինչպէս նաեւ Մեսրոպեան վարժարանի աշակերտներ
Նայիրա Պաղտասարեան եւ Պէթի Սուլեան, որոնք երգեցին ազգային երգեր: Այս առիթով, խօսք
առաւ Մեսրոպեան վարժարանի տնօրէն պրն. Կրէկուար Գալուստ, որ յայտնեց, թէ Սարդարապատի
մեծ յաղթանակի ոգին շարունակեցաւ պատմութեան իրերայաջորդ հանգրուաններուն եւ Մայիս 28-ի
շունչը բացայայտ էր Արցախեան ազատագրական պայքարին մէջ, երբ հայերը միասնաբար կռուեցան
Սարդարապատեան կամքով: Մեսրոպեանի տնօրէնը ըսաւ. «Մենք հզօր ենք Հայաստանով, եւ Հայաստանը
հզօր է մեզմէ իւրաքանչիւրով»: Սարդարապատի պանծալի յաղթանակին նուիրուած աշակերտական
հաւաքը փակուեցաւ «Սարդարապատ» յաղթերգով եւ «Պահպանիչ»ով: